Álvaro Illobre gaña o Open de tenis de cadeira de Marbella
A pasada fin de semana disputouse en Marbella o V Open de tenis en cadeira de rodas nesta cidade. O Club ADM Ferrol desprazou a 3 xogadores a este torneo, sendo Álvaro Illobre o máis destacado.
Como nº3 no ranking nacional, Álvaro participou no sorteo principal, xogando na primeira rolda contra outro xogador do Club ADM Ferrol, Juan Gutiérrez, ao que gañou por 6-4 7-5. Foi un partido difícil xa que lle custou adaptarse á pista e ao vento dominante.
Xa en semifinais, tivo que loitar con outro galego, Martín Varela, amigo e compañeiro de dobres, ao que venceu noutro difícil encontro 6-4 2-6 6-2. Con esta vitoria Álvaro chegou á final e volveríase enfrontar ao júnior madrileño Dani Caverzaski. Esta vez a vitoria caeu do lado do Aresano, gañando por 6-2 por 6-4, tendo problemas no segundo set, pero Álvaro volveu a levar este trofeo, a primeira vez que gañou nesta cidade, e sendo o seu primeiro torneo da tempada.
O outro xogador do ADM Ferrol foi Roberto García e xogou no segundo cadro chegando ás semifinais, perdendo contra un xogador local.
En dobres, Varela e Illobre chegaron á final tras dúas cómodas previas para eles, pero na final non tiveron un bo encontro e perderon ante Caverzaski e Roberto Chamizo, cos que perderon por 6-2 por 7-5.
O seguinte compromiso de Álvaro Illobre será a súa participación no Mundial de Sudáfrica, onde viaxará o 22 de abril.