Martín De la Puente conseguiu sumar un novo título de campión de España ao seu palmarés e xa van cinco, igualando a marca que comparten o galego Álvaro Illobre e os cataláns Jordi Ros e Quico Tur.

O XXXI Campionato de España MAPFRE de Tenis en Cadeira celebrouse do 15 ao 18 de decembro no Centro Municipal de Tenis Vall d'Hebron, en Barcelona.

Na modalidade individual, Martín De la Puente eliminou en cuartos de final a Álvaro Illobre, tamén galego, cun resultado de 6-0 6-1. Despois en semifinais desfíxose cun claro 6-1 6-0 de Quico Tur e por último na final logrou superar a Daniel Caverzaschi cun resultado de 6-3 6-0.

Nos dobres, Martín emparellou con Francesc Tur e Álvaro Illobre con Dominik Bukala. Ambas parellas enfrontáronse en semifinais cunha vitoria por 6-1 e 6-0 de De la Puente/Tur, que finalmente perderon por 6-1 e 6-4 na final ante Daniel Caverzaschi e Enrique Siscar.