O Campionato Galego de Pickleball 2025 concluíu cunha edición inesquecible que consolida o crecemento imparable deste deporte en Galicia. Celebrado no Parque da Xunqueira e no recinto Fexdega de Vilagarcía de Arousa, o torneo reuniu a xogadores de todas as idades e niveis, ofrecendo un espectáculo deportivo cheo de emoción, compromiso e calidade.

Un dos principais protagonistas foi Juan Pablo Tarazona Ochoa, que gañou os títulos de campión absoluto individual masculino e campión absoluto de dobres masculino, xunto a Diego Tarazona Ochoa, así como un terceiro posto en dobres mixtos 2º.

No cadro feminino, Iria Sampedro Araujo brillou con forza, gañando o campionato individual feminino e o campionato de dobres feminino xunto a Rafaela Sestelo Fernández, que tamén rematou subcampioa no campionato de dobres mixtos 2ª.

Mención especial para Asís Garrido Guerrero, protagonista indiscutible do torneo con tres títulos: individual unisex sub-14, dobres unisex sub-14 (con Lucas Faraldo Taboada) e dobres absolutos mixtos (con Sabela Uriz Corral). Completou a súa extraordinaria actuación cun terceiro posto no dobres masculino, xunto a Asís Garrido Hernández. O seu rendemento, tanto nas categorías xuvenís como absolutas, deixa claro que é un dos xogadores máis prometedores do pickleball galego.

Na categoría VET50, Ignacio Garrido Carrera dominou por completo, conseguindo un triplo histórico: campión individual masculino VET50, campión do dobres masculino de VET50 (con Emilio Carballés Sande) e campión de dobres mixtos de VET50 (con Begoña Pereira Martínez). A súa experiencia e nivel competitivo foron inapelables durante todo o torneo.

Na proba VET50 feminina, Adriana González Ferro coroouse campioa individual e tamén acabou subcampioa nos dobres mixtos do VET50, o que confirma a súa calidade e compromiso nesta categoría.

Entre as novas xeracións, Jesús Varela Lorenzo conseguiu dous subcampionatos: no individual sub-14 e no dobres sub-14 xunto a Mateo García de los Reyes Rey-Cabarcos, consolidándose como un dos novos talentos do circuíto.

Esta edición tamén destacou polo seu compromiso coa sustentabilidade. Grazas a unha iniciativa da Federación Galega de Tenis, reduciuse o uso de plástico ao proporcionar botellas reutilizables aos participantes, fomentando hábitos máis responsables dentro do deporte.

Finalmente, os organizadores queren expresar o seu agradecemento especial aos patrocinadores que fixeron posible este evento: o Concello de Vilagarcía de Arousa, Lintel, Head e o Centro Comercial Arousa. O seu apoio foi clave para o éxito deste campionato.

O Campionato Galego de Pickleball de 2025 demostrou que este deporte chegou para quedar, cunha comunidade cada vez máis forte e comprometida e un futuro ilusionante.

Grazas a todos os participantes e parabéns aos campións! Vémonos na próxima edición.

Campionato Galego de Pickleball, Cuadro de Honra