O CCD de Sanxenxo e o CC Mercantil e Ind. de Vigo, acollen a 2ª Proba do Circuíto Galicia Head Tour (infantil e júnior) e o Campionato Galego Alevín e Cadete.

Queremos informarvos que houbo un problema coa nova plataforma de xestión de torneos da Real Federación Española de Tenis (ISQUAD) durante o sorteo do pasado luns.

Detectamos erros de clasificación nalgúns cadros e onte consultamos coa RFET e indicaron que estaban a facer probas coa futura clasificación (aínda sen publicar).

Tivemos que revisar todos os cadros e detectamos que as probas que estaban a realizar afectaron á clasificación dos xogadores en 6 cadros (dos 22 que temos).

Unha vez que a RFET resolveu o problema, realizamos un novo sorteo usando a clasificación actual (setembro) só para os seis cadros afectados; o resto dos cadros permanecen sen cambios. Polo tanto, os sorteos que publicamos agora son todos correctos.

A Federación Galega de Tenis leva meses en desacordo coa RFET (Real Federación Española de Tenis) en canto á posta en marcha desta nova plataforma de xestión, xa que cremos que aínda non está preparada para o funcionamento normal das competicións individuais e por equipos, a xestión de licenzas e outros asuntos administrativos. O incidente ocorrido o luns, e o feito de que aínda non puidesen publicar a nova clasificación cinco meses despois, non fai máis que reforzar a postura que mantén a Federación Galega de Tenis.

Ademais, tamén lles transmitimos que é necesario corrixir certos aspectos para que os procedementos sexan seguros e fiables para todos os usuarios, aínda que non atenderon estas solicitudes.

Continuamos as conversas coa RFET para defender os intereses de todos os clubs, xogadores, adestradores e árbitros galegos.